السلام عليكم ورحمة الله وبركاته
أنا محتارة جدا ومش عارفة اوصل لحل أرجوكم ساعدوني
أنا مخطوبة من ٥ شهور عمري ٣٢ وخطيبي ٣٩ كان متزوج وعنده بنت عندها ١١ سنة البنت مع امها
العفش عنده انا هجيب بس المطبخ والنيش والأجهزة الكهربائية وهدومي والمفروشات وتم دهان الشقة هو طيب ومحترم لكن وسط دا كله كان بيقولي خسي خسي انا كنت من زمان من قبل ما اعرفه كنت بقلل اكلي بالتدريج لكن هو عاوزني امشي على نظام الصيام المتقطع لا رز ولا مكرونة ولا عيش وبعد الساعة ٦ مفيش حاجة تدخل فمي خالص عملت كده وتعبت جدا ووقعت جه لابويا يقوله هوديها جيم وهنعمل دايت وكمان كان بيغلط في اسمي وينادي عليا باسم طليقته ويقولي انزلي السوق اتعلمي الفصال فاصلي فاصلي وخليكي معايا ساعديني نروح نشتري حاجة فاصلي معايا
حددنا نروح نحجز القاعة والكوافير والاستوديو قالي مش هحجز انا عاوز اعرف رأيك هتوافقي ولا لأ انا تعبان عندي الفقرة ٤و٥ ورجليا تعباني قلتله بدام قلت كده يبقى فيه حاجة مخبيها هل ده له تأثير على الحياة الزوجيه او الخلفة يقولي معرفش بس اعتقد لأ المهم بعدها بفترة حجزنا في نفس اليوم يقولي عاوز ااجل عشان تخسي مش هحس بالسعادة طول مانتي كده وانا مش فيل انا بس بطني زايدة شوية لحد ما قالي كنت عاوزك طويلة أنا ١٦٠ وهو ١٨٠ هو أنا كده قصيرة
قالي فجأة عاوز العود زي العود اللي كان معايا عاوزني شبه طليقته في الجسم والطول دايما يجرحني وقلبي وجعني معاه من كتر الكلام بيمط كتير في الكلام في أمور تافهه جدا لحد ما قالي انا مش عايز اعمل فرح اصلا انا هعملك فرح عشان انتي اللي عاوزه لكن انا عشت الفرح والزفة وكده قبل كده ومش هعمل حنة والفرح يكون ساعة أو أقل مابحبش الوش والصوت العالى
كسر فرحتي في كل مناسبة حلوة سواء لما حجزنا كسر فرحتي لما عملت المطبخ برضه كسر فرحتي ومستخسر فيا شفاط للمطبخ جديد عاوز يحط القديم لدرجة بيقولي هي سايبة مشابك ابقى خديها قلتله ولع فيها ما بالمرة لو سايبة هدوم اخدها هو أنا جايبة من الشارع ولا انا شحاته
المفاجأة بقى عرف ان طليقته اتجوزت بطل ياكل وبطل يكلمني ومش طايقني ويقولي تعبان ومتضايق وارفان
أنا قررت افسخ الخطوبة هل كده انا ظلماه معايا قولولي رأيكم ايه انا كان قلبي بيوجعني بحس بنغزه فيه لما بعدت عنه كذا يوم حسيت براحة لان كنت دايما بعيط ومقهورة ومش حاسة نهائي بالفرحة واني عروسة