الحلقة الثامنة من مسابقة سمعتى كلام الحبيب .. طيب يلا نطبقه ، كل سنة وإنتم طيبين

الحلقة 8 :

( مخالفات في المسجد )





إيه الأخبار ؟
كله صلى التراويح امبارح ؟
ماشاء الله تبارك الرحمن
الله يكرمكم ويجعله في ميزان حسناتكم


في ناس مش بتحس بالخشوع إلا في الصلاة في المسجد
وكمان بتخاف تكسل لو قعدت في البيت
خلاص يا جميل روحي المسجد مادام نفذتي الضوابط اللي قلنا عليها امبارح







بس لسه في حاجة لأه حاجات كمان


هو ينفع علشان أصلي أنا مش مهم الباقي يعرفوا يصلوا بخشوع ؟

في نساء ربنا يهديهم بتجيب معاها لصلاة التراويح جميع الأولاد، الصغار والكبار وكأن المسجد حضانة،
فلا الإمام عارف يركز في القراءة ولا اللي بيصلوا عارفين يخشعوا ولا النساء عارفين يصلوا خالص
ليه؟
علشان جايبة ولادك كلهم وسيبتيهم يعملوا اللي عايزينه



عايزة تعملي خير وتكسبي ثواب
بس في المقابل منعتي خير كتير عن الناس
بالله عليكي ده ينفع ؟



عايزة تاخديهم معاكي يبقى خير وبركة وبتعوديهم على حب المسجد وربنا يكرمك
بس تكوني معلماهم أدب الجلوس في المسجد
ولو لسه صغيرين ومش قادرين يستوعبوا يبقى بلاش تاخديهم معاكي
واحتسبي الأجر عند الله





إحنا مش بنقول إن ذهاب الأولاد الصغار للمسجد حرام ،
لأه
الرسول صلى الله عليه وسلم يقول : "مروا أبناءكم بالصلاة لسبع واضربوهم عليها لعشر" رواه أحمد وصححه الألباني
الصحابة كانوا بيجيبوا أولادهم والرسول صلى الله عليه وسلم كان بيخفف الصلاة علشانهم
الرسول -صلى الله عليه وسلم- أخبر في الحديث الصحيح: (أنه يدخل الصلاة ويريد التطويل -يريد تطويلها- ثم يسمع بكاء الصبي فيخفف؛ لئلا يشق على أمه)


لكن لازم في الأمر اتزان
ولو هيفضلوا يعيطوا ويتخانقوا ومحدش يعرف يصلي
يبقى صلاتك في بيتك أفضل
ومن غير زعل







طيب ايه كمان ؟
في ناس بتروح المسجد تصلي وتفضل لوك لوك لوك
وتفضل تتكلم لغاية ما يجي الإمام يركع
يقولوا فاصل ونواصل بعد الركعتين
لأه وكمان يرفعوا الصوت


يا ستي لو حتى مش بتتكلمي في طبختي إيه وفلانه قالت وعلانه عادت
وقاعدة بتقرئي قرآن ولا بتأمري بالمعروف وبتنهي عن منكر
لازم تخلي بالك إن في رجالة سامعينك وإنك بتشوشي على اللي بيصلوا ومش بتخليهم عارفين يركزوا

فخلي بالك من الموضوع ده الله يرضى عنك









اللي بعده
الواحد بيشوف المسجد بعد الصلاة وكله ورق ومناديل
وكمان نوى التمر تحت السجاجيد
قال ايه بتحافظ على نظافة الجامع

ينفع كده بيت الله سبحانه وتعالى نعمل فيه كده
ده لو رحتي عند حد وحد من الأولاد وقع حاجة تفضلي تقولي عيب يا ولد اسكتي يا بنت


طيب في بيت الله مش مكسوفة ؟




ولا الحمامات أكرمكم الله
ايه ده ؟
وايه المناظر اللي بنشوفها
دي بيوت الله
خليها نظيفة





عَنْ ‏‏أَبِي هُرَيْرَةَ ‏‏أَنَّ ‏رَجُلًا أَسْوَدَ ‏، ‏أَوْ امْرَأَةً سَوْدَاءَ ،‏ ‏كَانَ يَقُمُّ الْمَسْجِدَ ؛ فَمَاتَ فَسَأَلَ النَّبِيُّ ‏صَلَّى اللَّهُ عَلَيْهِ وَسَلَّمَ ‏عَنْهُ فَقَالُوا : مَاتَ ، قَالَ : أَفَلَا كُنْتُمْ ‏‏آذَنْتُمُونِي ‏بِهِ ‏؟ ‏دُلُّونِي عَلَى قَبْرِهِ ‏، ‏أَوْ قَالَ : قَبْرِهَا ‏، فَأَتَى قَبْرَهَا فَصَلَّى عَلَيْهَا . رواه البخاري ، ومسلم .


تقم يعني بتنظف


شوفتي الرسول صلى الله عليه وسلم لما غابت سأل عنها ازاي؟
ياترى لما يشوفك هيقول عليكي إيه ؟






والجديد اللي بقينا نشوفه إننا نحجز مكان في المسجد
يعني لو في كراسي في المسجد للي عندهم أعذار وبيصلوا وهمه جالسين ربنا يشفيهم ويعافيهم
نلاقيهم بقى حطوا ورقة بإسمهم على الكرسي علشان محدش غيرهم يتجرأ ويقعد مكانهم


بجد مش لاقية تعليق أقوله

اللهم اهدنا لأحسن الأخلاق لا يهدي لأحسنها إلا أنت






قادرة تلتزمي بالحاجات دي روحي

مش قادرة صلي في بيتك ومن غير زعل

مش علشان ناخد ثواب نرجع بجبال من الذنوب