متكركبيش الدنيا فوق دماغك .....
في ناس كثير للأسف بتكركب على نفسها المواضيع والمشاكل اللي بتمر بها .. لدرجة انه يكون الموضوع بسيط في حد ذاته وهي تضخمه وتكبره بدون داعي للحد انها بتحس بالعجز في التعامل مع مشاكلها والحياة .
هعطيكم مثال بسيط على كدا
شخص نسي زجاجة الميه بتاعته في الجيم ومشي وبعد رجوعه للمنزل اكتشف الأمر .. فيصيبه الهم الكبير بسبب ان تفكيره وصله انه بالشكل دا هو مهمل ومستهتر وممكن ينسى حاجات اكبر تهمه زي موبايله او محفظته وساعتها هيعمل ايه ويتصرف ازاي وهيواجه شريكه ازاي .
مع ان التعامل الصحيح المتوازن مع هذه المشكلة هو انه ممكن يضايق دقيقة او دقيقتين بالكثير ويقول لنفسه معلش المره اللي جايه هركز اكتر مع حاجتي .. ويتقبل ما حدث وينتهي الأمر عند هذا الحد .
لكن للأسف في ناس بيكركبوا الدنيا على دماغهم مع اي مشكلة تواجههم وبالتالي كمان قد يصيبهم احساس بالعجز والخوف الشديد من مواجهة المشكلة .. يوصله انه يهرب منها فيحصل تراكم لمشاكله وحياته بتزداد تعقيد وتانيب ضمير وانعزال وهروب من المجتمع .
فمن فضلك
لما تحصلك مشكلة حاول تبسطها عليك على قد ما تقدر لان دا هيساعدك ان نفسيتك تهدأ وتفكر في الأمر بموضوعيه وبيزود احساسك بقدرتك على حل مشاكلك بشكل اكبر ومواجهتها
وبالتالي مهم جدا تتعامل مع ابعاد المشكلة اللي حصلت وفقط مش ان مخك يبدأ يشرق ويغرب ويتخيل امور اكبر من المشكلة ويخوفك من عدم قدرتك على التعامل معاها ويتهمك انك خايب ومستهتر ومش نافع في حاجه !!
ولو حصل ان دماغك كركبت عليك الدنيا وضخم لك المشكلة بشكل سريع وبدون وعي منك .. انتبه لما حدث وابدأ فكر بشكل مختلف بيعتمد على تبسيط الأمر والتعامل مع ابعاد المشكلة وفقط ومحاولة النظر إليها من منطلق اليسر وتخفيف الأمر عليك
وبالتالي لما تجبر عقلك يفكر بالشكل دا واعتيادك على هذا الأمر انت بتبرمج عقلك على التعامل بيسر وببساطه مع مشاكلك مع الوقت ، وهتحس وقتها ان حياتك اختلفت 180درجة
الخلاصة
تقبل اخفاق وفشلك احيانا وكن ممتن له كمان لانه كان رساله لك علشان تتعلم اكتر مما حدث وتزداد وعي ونضج وخبرة وقدرة في التعامل مع المشاكل الشبيهه في المستقبل
فأحنا بنتعلم وبنتطور مع فشلنا لكن دا مش بيحصل مع نجاحنا على الرغم ان النجاح حلو ورائع وبيعطينا السعادة لكن دي ميزه في فشلنا احيانا لا يعطيها لينا اي شيء آخر
وخد الأمور ببساطه وسهلها عليك علشان حياتك تكون اسهل ومشاكلك تتحل بيسر
لكن لو الموضوع زاد معاك ومش عارف تتعامل معاه بمفردك فياريت تذهب لمتخصص كويس يساعدك انك تتغير
ودمتم على خير ��
رشا حمودة
المستشارة الاسرية وممارس الدعم النفسي وتطوير الذات
_______________
ايمان البنداري
الثلاثاء أكتوبر 04, 2022 9:16 pm