1561 تاريخ التسجيل : 08/01/2021 العمر : 3 الموقع : اسكندرية عروس البحر الله غالب على امره
موضوع: 4 أفكار لـ توفير مصروف البيت والميزانية الثلاثاء ديسمبر 06, 2022 12:13 am
4 أفكار لـ توفير مصروف البيت والميزانية
أهم نصائح لـ توفير مصروف البيت والميزانية
1* قللي النزول
بمعنى
مش كل يوم تنزلي السوبر ماركت وتلفي بالعربية او السلة لانك هتلاقي نفسك وضعتي في السلة حاجات كتيييير ممكن متكونش مهمة بس زغللت في عنيكي ونفسك تجيبيها ولو حصل كدة يبقى الميزانية ضربت خلال مرتين ثلاثة هتنزلتي فيهم ..
حاولي تنزلي مرة واحدة بس في الشهر عشان تجيبي مستلزمات البيت اللي ممكن تقعد شهر زي المنظفات ومساحيق الغسيل والبقوليات.. ومرتين للجبن والأغذية والخضروات. ( بالكمية المناسبة على حسب استخدامك طبعا )
* خلينا متفقين إننا بنحب نتفرج على جروبات بيع الأونلاين وحتى البلوجرز اللي بيعلنوا عن منتجات ممكن تعجبنا فنلاقي نفسنا لا إراديًا بنطلبها.. ممكن يكون الموضوع ببساطة زهق أو الحاجة حلوة بجد وتغريكي تشتريها حتى لو مش محتاجاها، بس الموضوع ده بيأثر بشكل كبير في مصروف البيت أو حتى مصروفك الشخصي.. جربي تعملي unfollow للجروبات دي وهتحسي بفرق كبير في ميزانية الشوبينج على الحاجات اللي مالهاش لازمة وفعلًا مش محتاجاها.
2* استغني عن الفيزا و الكريدت كارد
بعض الناس شيفاها ميزة ومتعة كبييرة تشتري كل اللي انتي عايزاه وتعطي للكاشير الكارت وثانية واحدة خلاص دفعتي من غير ما يخرج جنيه واحد من جيبك ..
والكريدت كارت اشتري دلوقتي وسددي بعدين والساعة بخمسة جنيه والحساااابة بتحسب أه و اه الكارت الصغنن ده كفيل إنه يخليكي تفلسي بسرعة لإنه الوقت اللي بيبقى معكيش فلوس فيه هيغريكي تشتري وتدفعي بعدين.. هو أينعم الكارت ده مهم وبيبقى فيه عروض وبينفع في وقت الطوارىء والأزمات، بس لو استغنيتي عنه وانتي بتشتري أساسيات البيت هتبقي عارفة ميزانيتك اللي مش هتقدري تعديها، وبالتالي هيوفر معاكي كتير في مشترياتك
3* الدليفري لا والف لا الطبخ متعب وبيستهلك وقت وطاقة كبيرة، وبالأخص لو انتي بتشتغلي، فالحل السهل والسريع بيبقى الدليفري اللي عايز ميزانية تانية لوحده.. لو انتي بتشتغلي ومعندكيش وقت تطبخي، جربي تخصصي يوم في الأسبوع تعملي فيه أكلات جاهزة وتطلعيها من الفريزر.. ممكن كمان لو ميزانيتك تسمح تشتري أكلات مجمدة هتكون أوفر بكتير من الدليفري.
4* العروض
فيه محلات معينة معروف عنها العروض كل فترة الحق العرض ... الحق التوفير ... وفر وحوش النقدية .. وحاجات كدة ... اقولك دي اسوأ حاجة لان مش كل اللي في العروض صالح للإستخدام بمعنى بعض المحلات تيجي لحاجة صلاحيتها قربت تخلص او خلصت فعلا ويعملوا عرض بن لذينا اشتري واحدة وخدي الثانية هدية اشتري كيلو وعليه نص هدية وخصوصا اللحوم ( انتي ضامنة اللحمة دي صالحة ولا فسدت ؟؟؟ ) وليه عليها نص هدية على اساس اللحمة بترخص يعني ؟؟؟ طب اسألي اقرب جزار عندك كيلو الحمة بكام وقارني الفرق وفكري ليه بيعملوا عروض ( اللي يقولك حاجة زي كدة قوليله بالف هنا وشفا ليك ولعيالك انا ليا عيال اغلى عندي من عروضك الجبارة )
اخيرا ركزي في تاريخ الصلاحية لأي حاجة بتشتريها مع حفظ الله وامنه
الثلاثاء ديسمبر 06, 2022 12:13 am
مش كل يوم تنزلي السوبر ماركت وتلفي بالعربية او السلة لانك هتلاقي نفسك وضعتي في السلة حاجات كتيييير ممكن متكونش مهمة بس زغللت 
في عنيكي 
ونفسك تجيبيها
أه و اه الكارت الصغنن ده كفيل إنه يخليكي تفلسي بسرعة لإنه الوقت اللي بيبقى معكيش فلوس فيه هيغريكي تشتري وتدفعي بعدين.. هو أينعم الكارت ده مهم وبيبقى فيه عروض وبينفع في وقت الطوارىء والأزمات، بس لو استغنيتي عنه وانتي بتشتري أساسيات البيت هتبقي عارفة ميزانيتك اللي مش هتقدري تعديها، وبالتالي هيوفر معاكي كتير في مشترياتك
وخصوصا اللحوم ( انتي ضامنة اللحمة دي صالحة ولا فسدت ؟؟؟ ) وليه عليها نص هدية على اساس اللحمة بترخص يعني ؟؟؟ طب اسألي اقرب جزار عندك كيلو الحمة بكام وقارني الفرق وفكري ليه بيعملوا عروض