مسابقة سمعتى كلام الحبيب .. طيب يلا نطبقه ( الحلقة 19)

الحلقة 19 :
( العشر الآواخر )

ياه معقولة الأيام عدت بسرعة كده ؟
كلها يوم وندخل في العشر الآواخر

رمضان جرى بسرعة وملحقناش نعمل اللي كان نفسنا نعمله ، والله أعلم هنعيش لرمضان اللي جاي ولا .............

ربنا يطول أعمارنا في عمل صالح

بس لسه قدامنا فرصة

كلها ليلة ونبدأ أهم عشر ليالي في رمضان
العشر الآواخر
بدأ وقت الجد والتشمير عن السواعد
عن عائشة رضي الله عنها، قالت: { كان رسول الله إذا دخل العشر شدّ مئزره، وأحيا ليله، وأيقظ أهله } وفي رواية: { أحيا الليل، وأيقظ أهله، وجد، وشد المئزر } رواه البخاري ومسلم

وقالت : «كان رسول الله صلى الله عليه وسلم يجتهد في العشر الأواخر ما لا يجتهد في غيره» رواه مسلم.

طيب ايه اللي نقدر نعمله في موسم التنافس على الطاعة ؟
فرصة ممكن تكسبي السباق وتفوزي بجنة عرضها السماوات والأرض

ده وقت عمل وتنافس
تصلي وتقري قرآن وتدعي وتذكري الله وتتصدقي
مش وقت نوم أبدا
مش عايزة الجنة ؟
مش عايزة العتق من النيران ؟
مش عايزة مغفرة ربنا سبحانه وتعالى ورحمته ؟

طيب مستنية ايه؟
اشتغلي بقى واجتهدي

طيب لو عندك الحيض ؟
ولا تزعلي نفسك خير برضه
إنتي مش عارفة حديث أبي موسى أن رسول الله صلى الله عليه وسلم قال : (إذا مرض العبد أو سافر كتب الله تعالى له من الأجر مثل ما كان يعمل صحيحا مقيما)رواه البخاري

يعني كل حاجة كنتي بتعمليها ومنعك منها الحيض أجرها ماشي برضه كأنك بتعمليها

شوفتي كرم ربنا سبحانه وتعالى واسع ازاي؟
وأكثري من ذكر الله

حاجة مهمة كمان قبل ما أمشي
نصيحة لأختي
متضيعيش العشر الآواخر بعمايل الكحك والبسكوت وتنظيف البيت
كل ده لاحقين عليه
اللي منقدرش نعوضه لما تضيع مننا العشر الآواخر
محدش ضامن عمره لرمضان اللي جاي

أشوفكم بكرة إن شاء الله