مسابقة سمعتى كلام الحبيب .. طيب يلا نطبقه ( الحلقة 20)

الحلقة 20 :
(الاعتكاف )

كل سنة وانتم طيبين
الليلة اول ليلة في الليالي العشر
أفضل عشر ليالي في السنة كلها

طيب أفضل حاجة ممكن نعملها خلال العشر أيام الأخيرة في رمضان إيه ؟

ماشاء الله إجابة صحيحة

الاعتكاف

هو الاعتكاف مش للرجال بس
دخلنا ايه بالاعتكاف ؟

هههههههههه
مالك مخضوضة كده
الاعتكاف للرجال وللنساء
روى البخاري ومسلم عَنْ عَائِشَةَ رَضِيَ اللَّهُ عَنْهَا زَوْجِ النَّبِيِّ صَلَّى اللَّهُ عَلَيْهِ وَسَلَّمَ

أَنَّ النَّبِيَّ صَلَّى اللَّهُ عَلَيْهِ وَسَلَّمَ كَانَ يَعْتَكِفُ الْعَشْرَ الأَوَاخِرَ مِنْ رَمَضَانَ حَتَّى تَوَفَّاهُ اللَّهُ ، ثُمَّ اعْتَكَفَ أَزْوَاجُهُ مِنْ بَعْدِهِ .

طب الأول عارفين يعني إيه الاعتكاف ؟

أكيد طبعا عارفين بس للتذكرة نقول
الاعتكاف هو المكث في المسجد بنية التقرب إلى الله عز و جل.
يعني لازم يكون في المسجد ويكون بنية الاعتكاف .

ويبقى الوقت اللي هتقضيه في المسجد بنية الاعتكاف كله عبادة ،
طبعا مع الصوم يبقى الصلاة و تلاوة القرآن والذكر والدعاء وكل الطاعات اللي تقدري تعمليها .

واحدة هتيجي تقولي
للنساء ايه بس مين فينا اللي هتقدر تبات بره بيتها في المسجد لمدة عشر ليالي وتسيب بيتها وأولادها ولو حتى مش متجوزة هتبات بره البيت ازاي ؟

صح كلامك مظبوط فعلا صعبة وفيها مشقة خصوصا إن اعتكاف المرأة ليه شروط :

1- أن يكون اعتكافها في مكان خاص بالنساء لا يطلع عليه الرجال أما إذا حصل اختلاط فيحرم ذلك.

2- أن تأمن على نفسها الفتنة فإن خشيت على نفسها الفتنة لكون المكان غير آمن أو منعزل أو غير ذلك حرم عليها الإعتكاف.

3- أن لا يكون في اعتكافها تضييعا لحق زوج أو رعاية ولد أو بر أم ونحوه فإن أدى اعتكافها إلى ذلك حرم.

4- ويشترط أن يأذن زوجها باعتكافها فإن لم يأذن كانت عاصية باعتكافها ومفرطة بطاعة زوجها.

كده أكيد حسيتي إنه مستحيل أو على الأقل صعب قوي إنك تقدري تعتكفي

بس إنتي عارفة إن جمهور العلماء قالوا إن أقل مده للاعتكاف لحظة ؟

يعني لو دخلتي المسجد ساعة واحدة ونويتي الاعتكاف فيها وقعدتي تقري قرآن وتصلي وتذكري الله اتحسب ليكي اجر الاعتكاف ؟

شوفتي سهلة ازاي ؟

ربنا يتقبل منا جميعا

نتقابل بكرة إن شاء الله