كنت دايما اسمع جملة " ربنا يكفيك شر الحوجة " أو " إلهى مايحوجك " وافهمها بمعنى إن ربنا يكفينا شر الاحتياج المادى ومنحتاجش فلوس من حد ، بس بعد كدة فهمت إن الحوجة طلع ليها أشكال تانية ، ألعن 100 مرة من احتياجك لشوية فلوس !!
انك مثلا تتحوج لصاحب يسمعك ويهتم بمشاكلك لما تكتئب والناس متسألش عنك.. وتبقى انت اللى بتكلمه وتدور عليه بدل ماهو يحسسك انه جمبك ويتطمن عليك..
انك تتحوج لأب متوفي وتحتاجه يقويك ويقف فى ضهرك..
الحوجة ممكن تكون ل أم اتوفت ومش لاقى حضن يطبطب عليك وقت وجعك..
او تتحوج لحد فى ايده يساعدك فى مشكلة او يقضيلك حاجة مهمة بس مش عاوز يكلف نفسه ويمدلك ايده..
ممكن تتحوج بس لكلمة طيبة تطيّب خاطرك لحظة يأس وسط ناس قلوبها بلاستيك..
الحوجة مش بس فلوس.. الواحد ممكن يتحوج عاطفيا لميت شعور الناس اللى حواليه بتستخسره فيه..
علشان كدة  فعلا ربنا يكفينا شر الحوجة !!
" اللهم اغننا بفضلك عمن سواك "