الحقني الحمل هيموتني ..

ايقظت زوجها في منتصف الليل في هلع شديد

- حبيببي الحقني .. الحمل هيموتني

* خير يا حبيبتي في ايه ؟؟!!
- أنا عايزة أنزل البيبي قبل ما يموتني
* انتي بتخرفي تقولي ايه .. انتي في آخر السادس خلاص 
- أنا حاسة اني هموت قبل ما أولد .. انا كل ما آجي أنام بحس إني هيغمى عليا وعايزة أرجع وقلبي بيدق جامد .. بجد مش قادره
* انتي هتقلقيني عليكي ليه ؟؟ .. قومي غيري اما نروح المستشفى الوقتي حالا يللا


وذهبا إلى أقرب مستشفى وهناك أخبروا طبيب النساء والتوليد بما تعاني منه
فابتسم الطبيب قائلا :
- ودي حاجه بردوا تخليكي تستغني عن الجنين بسهولة كدا ؟!! دي حاجه بسيطة جدا
* بسيطة إزاي يا دكتور .. ؟؟!! بقولك بحس إني هموت لما باجي أنام
- أيوة ما هو دا بسبب وضع النوم الغلط لأنك بتنامي على ضهرك .. ودي حالة إسمها
Supine Hypo-tension Syndrome
* ودي فيها إيه مانا من أول الحمل بنام على ضهري ومكنش بيحصل حاجه


- علشان كان لسه البيبي صغير .. إنما دلوقتي كبر ..
فلما بتنامي على ضهرك بتخلي الجنين يقفل الوريد اللي بيرجع الدم للقلب ..
فالقلب يضخ دم قليل .. وضغطك يوطى فتحسي بهبوط وانك هيغمى عليكي وتبقي عايزه ترجعي


* طب والحل إيه يا دكتور أنا تعبت بجد 
- الحل بسيط جدا جدا .. هتغيري وضعية نومك وتنامي على جمبك الشمال .. بس كدا


* طب معلش لو فيها غلاسة يعني .. ليه مش اليمين دا حتى سنة
- يا ستي أعملي السنة لما تولدي بالسلامة .. 
انما لو نمتي الوقتي على جمبك اليمين هتضغطي على الكبد ودا ممكن يأثر عليه بعد كدا

لو كنتي حامل او تعرفي حد حامل .. لازم تعرفوا إن أفضل وضعية ممكن الحامل تنام فيها في الشهور الأخيره من الحمل هي على جمبها الشمال عشان تتجنب الحالة دي

تحياتي