تميزك ف عين غيرك ممكن يكسرقلبه .. بلاش تكسريه

- لما تزور حد والحد ده ساكن في مكان بعيد والطريق لبيته زحمة او مكسر ... مفيش داعي تحسسه انك اتبهدلت عشان تزوره ،.. هو بيبقي حاسس بالإحراج لوحده ... هو عارف ان المنطقة اللي هو عايش فيها زحمة ومكسرة ... وهو لو كان بإيده انه يسكن في مكان أحسن كان عمل كده.

- لما تزور حد شقته ضيقة او الجو فيها حر ... مفيش داعي كل شوية تتكلم عن شقتك الواسعة وتتكلم عن أهمية البراح والوسع والتكييف ... مش لازم تنغص عليه حياته .... هو لو كان قادر يشتري قصر ماكنش إتأخر.... هون عليه وحسسه ان شقته جميلة وفيها بركة رغم انها مش كبيرة.

- مفيش داعي تهزر مع حد بكلام انت عارف انه بيضايقه لمجرد انك بتستمتع بده.... للأسف في ناس بتتبسط لما تشوف اللي قصادها محروق دمه ومضايق.

- مفيش داعي كل ما تشوف صاحبك تفكره انه تخين وشكله وحش.... هو حافظ شكله كويس ومضايق منه.... لو عندك نصيحة تنفعه في مشكلته وهو هيقبلها قولهاله ... غير كده بلاش تحرجه.

- مفيش داعي تتكلم عن مدرسة ولادك الغالية النضيفة اللي بتعمل أنشطة كتير قصاد واحد ظروفه المادية إضطرته يودي ولاده مدرسة متواضعة جدا.

- مفيش داعي تتكلم عن عربيتك وإزاي هي بتسهل عليك حياتك قصاد واحد طلعان عين اللي جبوه في المواصلات كل يوم.

الانسان بطبيعته بيحب يحس بالتميز ... وبيحب اللي حواليه يحسوا بتميزه بده... وأحيانا شعوره بالتميز بيبقى مرهون انه يشوفه في عيون الآخرين .... بس الأسلوب ده ممكن يكسر قلوب ناس حوالينا وينغص عليهم حياتهم

_______________

ايمان البنداري

انتي الاروع ياقلبي تسلميلي

_______________

ايمان البنداري